Titanic steeds gewild
‘n Goue horlosie geskenk aan die kaptein van ‘n skip wat meer as 700 passasiers en bemanning van die Titanic gered het, is verkoop vir ‘n rekord bedrag van N$23miljoen.
Die 18 karaat Tiffany & Co.-sakhorlosie is aan kaptein Arthur Rostron gegee deur die weduwees van drie ryk sakemanne wat gesterf het toe die Titanic op 15 April 1912 gesink het nadat hulle ‘n ysberg getref het.
Rostron het die koers van sy stoomskip RMS Carpathia verander tydens ‘n reis van New York na die Middellandse See in 1912 nadat hy noodroepe van die sinkende Titanic gehoor het.
Die horlosie dra die inskripsie: “Oorhandig aan kaptein Rostron met die opregte dankbaarheid en waardering van drie oorlewendes van die Titanic 15 April 1912 mev John B Thayer, mev John Jacob Astor en mev George D Widener.”
Mev Astor se man John Jacob Astor IV was die rykste man aan boord van die Titanic, wat beroemd uitgebeeld is in James Cameron se 1997-film “Titanic”. Hy het daarin geslaag om sy swanger vrou in ‘n reddingsboot te kry, maar hy het saam met sowat 1 500 ander gesterf.
Die vorige rekord vir ‘n Titanic-verwante voorwerp wat op ‘n veiling verkoop is, was ook ‘n sakhorlosie, wat vroeër vanjaar vir N$26 miljoen verkoop is.
Vir die afslaer Andrew Aldridge is die jongste verkope ‘n teken dat belangstelling in die Titanic steeds hoog is.
“Die feit dat die wêreldrekordprys vir Titanic-memorabilia vanjaar twee keer gebreek is, toon toenemende vraag na memorabilia wat met die skip verband hou.
Die horlosie is aan ‘n private versamelaar in die VSA verkoop en die verkoopsyfer sluit fooie en belasting in wat deur die koper betaal is.
