Transito-roof: Polisie soek hulp
Die polisie vra dat die publiek op die uitkyk moet wees vir ‘n wit Volkswagen Jetta met getinte ruite, met verskillende GRN nommerplate. Die agterste nommerplaat lees GRN 27012 en die een aan die voorkant is GRN 32911. Dit kom na meer inligting bekom is oor die transito-rooftog by Grove Mall in die hoofstad, wat Kosmos 94.1 Woensdagoggend bekend gemaak het. Volgens die polisieverslag was drie sekuriteitsbeamptes besig om geld by winkels op te tel. Vyf gewapende mans het hulle bestorm. Vier van die mans het pistole gehad en die vyfde ‘n AK-47. Die wagte en bestuurder is beveel om op die grond te lê, terwyl die rowers die geldhouers gesteel het. Hulle het ook die wagte se dienspistole afgevat. Die geld-houers is in die rowers se wit Jetta gelaai en hulle het weggejaag deur die terrein se agterste hek, wat oop was. Net minder as 306 000 Namibiese dollar van verskillende besighede is geroof. Die wagte is ongedeerd en die polisie-ondersoek duur voort.
Leave a Reply