Trump kies ‘fracking’ oliehoof as energie-sekretaris
Donald Trump het Chris Wright, stigter en uitvoerende hoof van Liberty Energy, aangewys as sy keuse om die Amerikaanse energiedepartement te lei. Hy sal na verwagting die verkose president se belofte nakom om fossielbrandstofproduksie te verhoog. Liberty Energy werk met maatskappye wat olie en gas uit skalievelde ontgin deur hidrobreking, of “fracking”. Trump het in ‘n verklaring gesê Wright sal ‘n sleutelleier wees, innovasie dryf, rompslomp verminder en ‘n nuwe goue era van Amerikaanse welvaart en globale vrede inlui. Wright is klimaatsverandering-skeptikus. In ‘n video wat verlede jaar op sy LinkedIn-profiel geplaas is, het hy gesê: “Daar is geen klimaatkrisis nie, en ons is ook nie in die middel van ‘n energie-oorgang nie.”