Omwana gwomupresitente, Nangula Geingos, okwa popi kutya yo okwa li taya tyapula moDubai naavali yawo, Hage Geingob naMonica Geingos, mboka ya li koUnited Arab Emirates (UAE) okukalelapo oshilongo momutumba ngoka gwa li tagu ningilwa hoka.
“Tse otuli mefudho lyetu kaakunawe pamwe nofamili yetu. Otatu tyapula okukala natate gwetu, meme gwetu osho wo okutyapula tuli moDubai. Otandi indile Aanamibia nayo ya ninge oshinima sha faathana,” osho Nangula a popi ngaaka okupitila kiikondaneki yopankalathano koFacebook, oshiwike sha zi ko pethimbo e li koDubai naavali ye osho wo aamwayina.
Omupresitente opamwe nomunyekadhi gwoshilongo, oya waimine omutumba omuti-28 gwiilongo ya yooloka tagu ithanwa 28th Conference of the Parties (COP28).
Omutumba ngoka gwo-COP28, ogu na sha niikundathanwa ya pamba elunduluko lyonkalo yombepo nogwa tamekele momasiku 27 Novemba nogwa hulu momasiku 10 Desemba.
Omupresitente pamwe nomunyekadhi gwoshilongo oya pewa uusama koyendji sho ya yi koDubai noyana yane osho wo omutekulu gumwe, noshigwana otashi nyenyeta kutya otashi vulika iifuta yondhila nolukalwa moDubai kwa li ya futwa kepangelo.
Ashike nando ongaaka, ombelewa yomupresitente oshiwike sha zi ko oye ekelehi omapopyo ngoka, noya popi kutya aavali oyo yene ya kutha oshimaliwa mondjato okufutila oyana.
Aanona yomupresitente nomunyekadhi mboka taya popiwa kwa li ya ya nosheendo shepangelo koDubai oyo Kayla Elago, Nino Kalondo, Dangos Geingos, osho wo Nangula.
Oye li wo pamwe nomumwayina gwaGeingos, Salomo Kalondo. Osheendo shoka sha li komutumba ngoka gokoDubai osha li sha thikama po mAanamibia ye li 142.
Nangula okwa zi mokalungu kutya okuya kwawo koDubai inaku kutha nande osha moshigandhi shepangelo, ishewe inaya mona nande omauwanawa ga sha gepangelo sho ya li koDubai.
“Uuwanawa mboka tu na, okukala owala pamwe naavali yetu mboka yetu hole yo oye na oshimpwiyu natse nonande ohaya kala nomaipyakidhilo. Oshinyangadhalwa shepangelo okukutha ombinga momutumba gwoCOP28, osha li owala kombinga yaashoka! Tse katuli nande oshitopolwa shepangelo, onkene inatu waimina nande iigongi yasha nenge oonkundathana dha sha [dha pamba epangelo],” osho a popi ngaaka.
Nangula okwa geyithwa wo kwaashoka kwa li sha popiwa komundjandjukununi gwiikwapolitika Joseph Diescho ngoka oshiwike sha zi ko oye gumwe a nyana omupresitente nomunyekadhi sho ya faalele oyana koDubai.
“Joe Diescho onkene ta tsikile oku ulika nkene ke ena euveko lya sha kombinga yuukwashili. Ongaanona yomupresitente nomunyekadhi gwoshilongo moNamibia, katuna nande omauwanawa ga sha twa nuninwa okuza kepangelo – kutya nee ogegameno, ogomalweendo, ogopaunamiti, nenge yilwe,” osho a popi ngaaka.
Ashike nando ongaaka onkene Diescho a ndjika oondjala mevi kwaashoka a popi kombinga yaanona yomupresitente.
“Oshinima tashi popiwa oshi li kombinga yehepeko lyoonzo dhepangelo. Ongomukwashigwana, kandi na nande uupyakadhi kombinga yegameno lyofamili yomupresitente opamwe nomunyekadhi, ndjoka hayi kala ya gamenwa ethimbo kehe naashoka osho hashi ningwa muuyuni awuhe,” osho a lombwele oThe Namibian ngaaka, mEtine.
MEtiyali lya zi ko Diescho okwa popi kutya aanona yomupresitente nomunyekadhi “itaya yi owala molweendo ngaaka” pwaana oshimaliwa shepangelo sha longithwa, ngaashi iiyenditho osho wo egameno.
“Shoka osho hashi ningwa, naHengari keli mondjila okutya aafuti yiifendela inaya za sha. Sho osho nee aanona yaObama kaaya li haya yi naanaa momalweendo nomupresitente – molwashoka oye na okukala ya gamenwa,” osho a popi ngaaka.
Okupitila momukanda gwiikundaneki ngoka gwa pitithwa komupopiliko gwomupresitente, Alfredo Hengari, oshiwike sha zi ko okwe ekelehi lela omapopyo kutya aanona mboka okwa li taya futilwa kepangelo.
“Aanamibia osho wo iikundaneki naya kale ya shilipalekwa kutya kapu na nande osenda yasha okuza moshiketha shepangelo ya longithwa maanona mboka,” osho omukanda gwa yelitha ngaaka.
“Muule woomvula omugoyi dha piti, omupresitente Geingob nomunyekadhi gwoshilongo inaya za mo moongaku dhomulandu dhoshimaliwa shepangelo lyaNamibia, naashoka otashi yeleke kutya aanona yawo inaya adha nande iipumbiwa yokupewa uutekete wondhila nokufutilwa kepangelo,” osho omukanda gwa shangwa ngaaka.
Leave a Reply