Uulingilingi nawu vudhwe mo moNamibia – Nandi-Ndaitwah

Omupevipresitente gwongundu yoSwapo Netumbo Nandi-Ndaitwah okwi indile iilyo yongundu yawo ya longele kumwe mokuvudha mo uulingilingi moshilongo. Ndhoka okwe dhi popi pethimbo lyoshikonga shoSwapo shoka sha ningilwa mondolopa yaNkurenkuru moshitopolwa shaKavango Uuninginino, mehuliloshiwike lya zi ko. Nandi-Ndaitwah okwa popi kutya ongundu yawo oya pumbwa okukutha ko oongaku yi yapukile onkalo yuulunde pethimbo ndika ya taalela omahogololo gaayehe ngoka taga ka kala ko omumvo twa taalela. Okwa popi kutya oombepo oombwiinayi dhopapolitika ndhoka ya pumbwa okukondjitha omwa kwatelwa uukwamihoko nokatongo paitopolwa. “Otwa pumbwa okutseya kutya nonande omihoko odho oonzo dhenkondopeko, onkene uukwamuhoko hawu vulu oku tu yonagula, omanga kombinga onkwawo uulingilingi owo okankela ndjoka hayi li po oshigwana,” osho Nandi-Ndaitwah a popi ngaaka. Okwa popi kutya oshina okukala oshinakugwanithwa shiilyo yongundu okushilipaleka kutya omauwinayi ngoka gopapolitika oga kondjithwa.

“Itatu vulu okupitika Namibia li kale oshilongo sha topoka omolwuukwamuhoko nenge okatongo kopaitopolwa,” osho a popi ngaaka.

Omupevipresitente okwa popi kutya ongundu yawo ohayi kala aluhe tayi ponokelwa kwaamboka ya hala uuleli.

“Ongiilyo yongundu yoSwapo, otu na oshinakugwanithwa shokugamenena po ongundu kwaamboka taya lalakanene okuyuga ko uuleli koSwapo,” osho a popi ngaaka. Nandi-Ndaitwah okwa popi kutya opo ya shilipaleke kutya ongundu onkene yi na oonkondo, iilyo yongundu oyi na okushilipaleka kutya oya kaleka po emanguluko lyoshilongo ndyoka ya sindana nuudhigu. Okwa popi kutya opu na aanapolitika yamwe yokusheka, mboka haya kala aluhe ye li ompinge nenge inaaya hala oku uva ongundu yoSwapo tayi simaneke iilonga ya longa pethimbo lyekondjelomanguluko.

Nandi-Ndaitwah okwa gwedha po kutya oshinakugwanithwa oshi na okukala momake ga kehe gumwe opo ku shilipalekwe kutya omayakulo oga gandjwa pamukalo gu li nawa.

“Shoka otwa pumbwa oku shi ninga twa tala ko aantu ongoshinima shotango. Onkene otandi indile iilyo yongundu yoSwapo mboka ye li muka, mwa mwatelwa naanambelewa yepangelo, ya tale ko onkalonawa yAanamibia ongoshinima shotango,” osho a popi ngaaka.

Okwa popi kutya iilyo yongundu osho wo aanambelewa yepangelo naya kale ye na ohokwe yokulongela nokukwathela oshigwana. Omundjandjukununi gwiikwapolitika Ndumba Kamwanyah okwa popi kutya ongundu yoSwapo itayi longo neitulemo okukondjitha uulingilingi nokuhokololitha mboka ye na olunyala muulingilingi. “Osha fa owala ya taamba ko mboka ye na olunyala miikumungu yuulingilingi. [Eindilo lyaNandi-Ndaitwah okukondjitha uulingilingi] Kungame, ondiwete ta popiwa osima yowala, ashike kapu na nande onkatu yasha hayi katukilwa mboka ye na olunyala miikumungu yuulingilingi opo ya gandje oshiholelwa kwaamboka taye shi ningi,” osho a popi ngaaka.