Uumbishi tawu tyakaleke moshipangelo shaShakati

Uumbishi owundji mboka wu li momudhingoloko gwoshipangelo shaShakati otaku hokololwa we eta onkalo ya nika oshiponga momikunda dhoshipangelo shoka.

Gumwe gwomaapangi moshipangelo shoka nokwa tindi edhina lye li tumbulwe, okwa lombwele onzonkundaneki ndjika kutya uumbishi mboka owa nika oshiponga molwashoka ohawu vulu okuyaga oohanona, nomathimbo gamwe ohawu ndjindji mo uuyakonga.

Uumbishi mboka otaku hokololwa hawu nukile koombete dhaavu okukonga iikulya mbyoka hayi pewa aavu.
“Uuyankoga ohawu tulwa meyemele lyiiyaga omanga inaawu falwa kehala hoka hawu ka fikilwa. Ihawu vulu okufalwa kookamwe, onkene ohawu tulwa moka opo wu falwe ko palumwe, ashike oto adha uumbishi wa nukila meyemele ndyoka lyiiyagaya nokundjindja mu uuyankoga mboka. Uumbishi mboka ohawu kala wo tawu yaga aanona. Ishewe uumbishi mboka owu na omanganga,” osho a popi ngaaka.

Omuniilonga gulwe gwomoshipangelo shoka okwa hokolola kutya monakuziwa uumbishi mboka okwa li hawu kwatwa po noku ke ekelwahi miihwa, ashike aakwashigwana oya ka tameka taya nyenyeta kutya uuna we ekelwahi, ohawu tameke wa landula omagumbo nokudhipaga po oondjuhwa.

“Okuza mpoka Uuministili wOmidhingoloko, Omakuti nOmatalelopo oweya nokupopya kutya natu hulithe po okuweekelahi miihwa. Okuza mpoka otwa tameke oku wu thona,” osho onzonkundaneki ya popi ngaaka.

Ashike nando ongaaka, omupopiliko guuministili womidhingoloko Romeo Muyunda okwa lombwele onzonkundaneki ndjika uunambo kutya ota ka kwatathana noshipangelo shoka opo a vule okutya ko sha.

Odokumente ndjoka ya longekidhwa koshipangelo shiinamwenyo shedhina NHA Wedvet Clinic yi li kohi yedhina ‘Oshakati State Hospital Trap Neuter and Release Campaign’ oya popi kutya uumbishi 34 okwa li wa thonwa, nokwa li wa wendwa omukuthi gwoompwengu nokupewa omiti.

Oshikonga shoka osha ningwa momasiku 11 Febuluali. Onzonkundaneki ndjoka yi na owino moshinima shoka oya popi kutya odokumente ndjoka oyi na owala uuyelele kombinga yomukunda gumwe moshipangelo.

Omuniilonga gumwe okwa popi kutya uumbishi wuulumentu owa thonwa opo omwaalu gwoombishi kaagu indjipale we moshipangelo.

Sho onzonkundaneki ndjika ya talele po oshipangelo shoka uunambo, oya adha uumbishi wi ihanena meni lyoshipangelo.
Omukuluntu gwoshipangelo shaShakati, Ruben Kanime, ina tya ko sha natango kombinga yoshinima shoka.